Nú er að spíta í lófana, síðan búin að vera í fríi lengur en þeir sem að henni koma! En allir fjölskyldumeðlimir hafa verið í fríi í allt sumar. Sigvaldi byrjaði reyndar fyrr í vinnunni en áætlað var og heimasætan Elísabet byrjaði ekki í leikskólanum fyrr en 1. sept. og er húsmóðirin enn í fríi. Ástæða þessa mikla frís er að nýr fjölskyldumeðlimur mætti í heiminn 13.06.13 og má segja að lífið hafi að mestu leiti snúist hann síðan þá (ásamt því að elta Sigvalda og "bikkjurnar" um hálft Ísland). 

En húsmóðirin ákvað að halda í sér svo Sigvaldi gæti klárað vinnu og kynbótasýningar en þó nógu tímalega svo ekki myndi rekast á keppnir og annað sem stefnt var á. Þetta gekk allt upp, lítill og heilbrigður drengur mætti í heiminn og lífið lék við fjölskylduna. Það varð þó smá bakslag því þegar drengurinn var aðeins viku gamall veikist hann og allt var sett á "hold". Vikudvöl á barnadeildinni á Akureyri tók við á meðan sá litli jafnaði sig á sýkingu sem hann hafði fengið. Þrátt fyrir þetta gerðum við gott úr sumrinu; sumarbústaður, borgarferð, sveitaferð, fjórðungsmót, íslandsmót, skeiðmót, íþróttamót og fleiri mót, almenn ferðalög og góðar heimsóknir. 

Nú erum við loksins lent á Hólum eftir gott frí, skólastarfið er byrjað með krafti og veturinn aldeilis farinn að gera vart við sig. Laufksálaréttir eru á næsta leiti og hlökkum við til að fá góða gesti. Eftir það sjáum við fram á að leggjast í dvala fram á næsta vor...annaðhvort það eða fá góðan og ljúfan vetur sem fer vel mað mannskapinn.

Framundan hér á síðunni er mikil vinna. Setja inn fleiri myndir, gera upp sölusíðuna og ef tími gefst væri gaman að setja eitthvað um hestana okkar og ræktunina.

Þó tíðindi héðan hafa verið heldur döpur í vetur hefur engu að síður margt drifið á daga okkar hér fyrir norðan. Veturinn hefur verið góður upp á síðkastið þó hann sýni þess ekki merki að vilja fara. Við höldum þó fast í vonina um að vorið komi og við fáum hlýtt og gott sumar.

Hér á Hólum er ávalt líf og fjör. Nemendur halda uppi mannlífinu og margir nýjir mættir á svæðið þar sem um 20 nemendur mættu hingað galvaskir í mars til að þreyta síðasta 3ja árið sem kennt verður með gamla kerfinu. 2. árs nemar eru síðan flognir í verknám og nú styttist óðum í próf hjá hinum. Útskrift er á næsta leyti og sumarleyfi taka við. Alltaf nær þessi tími að koma aftan að manni þar sem manni finnst haustlaufin nýfallin, vetrartíðin staldrað stutt og að jólin hafi bara verið í gær. En alltaf kemur sú góða stund að maður tekur á móti sumrinu með opnum örmum sem sennilega flýgur hraðast yfir af okkar íslensku árstíðum. En þá er bara best að njóta á meðan laufin hanga á trjánum.

Úrtaka fyrir Meistaradeild KS fór fram í lok janúar og þótti skráning með besta móti. Keppt var um 8 laus sæti í deildinni og voru þétt setnir bekkirnir af hest-þyrstum áhorfendum. Fínustu hestar öttu þarna kappi og þeir 8 bestu fá svo að etja keppni við þá 10 bestu frá í fyrra. Vonandi verður deildin spennandi í ár og að hart verði brist um titilinn sem Bjarni Jónasson heldur sem fastast um frá því hann sigraði í fyrra. 

Í vikunni verður svo fyrsta keppnin og þá í fjórgangi. Þekkja má nokkra gæðingana sem skráðir eru til leiks, m.a. Penna frá Glæsibæ, Roða frá Garði, Kristófer frá Hjaltastaðahvammi, Hlekk frá Lækjamóti og Takt frá Varmalæk. Þessa hefur maður séð til á vellinum áður og er spurning hvort þeir berjist um þetta eða hvort einhver komi óvænt að sigrinum, jafnvel nýliði í deildinni!

Alltaf er þetta jafn spennandi!

Fyrir áhugasama má sjá myndir frá úrtökunni í janúar sem nálgast má HÉR

Hula sem er fædd 1992 var sýnd 5 vetra þá lítið tamin í einkunnina 7.94. Hula er með  1. verðlaun fyrir sköpulag og fyrir hæfileika er hún með 8.0 á línuna nema 6.5 fyrir brokk. Því miður var hún ekki sýnd aftur en hún átti mikið inni sem eflaust hefði skilað henni 1. verðlaunum. Það voru bræðurnir Sigvaldi og Óli sem fengu að njóta hennar í staðinn til útreiða og keppna. Sigvaldi hafði komið henni inn á landsmót 1998 en því miður  gátu þau ekki mætt á mótið en gaman hefði verið að sjá hvernig þeim hefði til tekist.
7 vetra var Hulu fyrst haldið og hún hefur skilað 12 afkvæmum. Hryssan hefur gefið allhiðahross, yfirleitt með góðu skeiði. Þetta eru næm, viljug og vinnusöm hross með ágætum fótaburði.  

Dreki frá Skógskoti (2000) var undan Hrynjanda frá Hrepphólum.  Dreki var mikill gæðingur og sjálfskipaður höfðingi hússins og þ.a.l.  frúarhesturinn. Svandís, móðir Sigvalda, var farin að keppa á honum mikið og byrjuð að ná góðum árangri þegar Dreki fórst skyndilega úr hrossasótt. Mikil eftirsjá er af Dreka sem var algjör draumahestur og fyrsta afkvæmi Hulu.

Sóldögg frá Skógskoti (2001) undan Róm frá Búðardal. Sóldögg hefur verið að ná góðum árangri í skeiðgreinum. Hún er mikill vekringur og á hún best einkunnina 7.33 í gæðingaskeiði og 7.87 sek. í 100m fljúgandi skeiði. Þessi tími kom henni fljúgandi inn á landsmót 2011 sem fór ekki betur en svo að á leiðinni þangað slasast hún verulega þegar kerra sem hún var í veltur utan vegar. Það var leiðinlegt að tímabilið var búið áður en það byrjaði þar sem árið áður hafði hún einnig verið úr leik sökum hestapestarinnar. Gleðin er sú að Sóldögg virðist ekki ætla kenna sér mein af þessari reynslu og er komin á fullt fjör og tilbúin í slaginn.



2002 og 2003 komu merarnar Kúnst undan Snerri frá Bæ og Snerpa undan Þjótanda frá Svignaskarði. Þær voru afbragðs reiðhryssur sem eru nú seldar.

Þrándur frá Skógskoti (2005) er undan Glampa frá Vatnsleysu. Hann lét ekki mikið fyrir sér fara framan af og en hefur verið að koma skemmtilega til. Hann er viljugur og einstaklega vinnusamur hestur.

Gullbrá frá Skógskoti (2006) er undan landsmótsmeistaranum Geisla frá Sælukoti. Hún mun nú ekki feta í fótspor föður síns á keppnisvellinum en hefur mikla burði í að verða æðisleg reiðhryssa fyrir alla. Hún er viljug, mjúk og þjál sem fer vel með manninn. Hún er nú seld.

Gló frá Skógskoti (2007) er undan skagfirska Glampanum. Gló er á  5. vetur, alhliðageng, stór og mjög falleg. 


Úti í stóði eru svo spennandi tryppi sem flest lofa góðu.
Tromma frá Skógskoti (2009)
- Undan Hróðri frá Refsstöðum
 Huldar frá Skógskoti (2010 - ógeltur)
- Undan Gaum frá Auðsholtshjáleigu
Dimmalimm frá Skógskoti (2011)
- Undan Kappa frá Kommu
2012 kom merfolald undan Vilmundi frá Feti.


Þeir eru þrír hestar á móti níu merum sem Hula hefur gefið. Vonandi á hún eftir að gefa nokkur afkvæmin til viðbótar sem munu skila rækturnarstarfinu til góðs með hjálp toppgæðinga.

Þó fréttaflutningur hafi verið nokkuð takmarkaður í sumar er nóg af þeim. Í stuttu máli væri gaman að rifja upp sumarið sem hefur verið sérlega gott. Landsmótið var sótt og augu barin á fjölmörg efnileg hross og önnur sem hafa sannað sig margsinnis. Að sækja Fáksmenn heim var alveg til fyrirmyndar og þá sérlega fyrir hross og knapa. Svæði áhorfenda og gesta var líka glæsilegt. Þetta er klárlega svæði sem landsmót á heima jafnt sem á landsbyggðinni. 
Segja má að Sigvaldi hafi verið í fullri vinnu við það að fylgja eftir nemendum sínum á völlinn. Mánudagurinn byrjaði á barnaflokki þar sem að fjórir krakkar kepptu í forkeppni. Þrjú þeirra riðu sig beint upp í milliriðla og skemmtilegt að segja frá því að þau voru öll að keppa fyrir Hestamannafélagið Skugga og því 100% árangur þar. Krakkarnir Aron, Gyða og Arna stóðu sig svo með príðum í milliriðlum. Aron og Gyða komust allaleið í B-úrslit og ekki lauk því þar því Aron og Hlynur riðu sig örugglega upp í A-úrslitin þar sem þeir enduðu í öðru sæti á eftir parinu Kambani og Glódísi.  Gyða og Hermann enduðu í því  13. og Arna og Bíldur í því 25. Frábær árangur hjá þeim öllum. Unglingarnir og ungmennin stóðu sig einnig vel, stelpa úr hestamannafélaginu Glað komst í milliriðla ungmenna með flottum árangri og unglingarnir voru alls ekki svo langt frá því að komast í milliriðla. Mikil ánægja var því þegar Landsmóti loksins lauk og sérstaklega gaman að sjá árangur Skugga-krakkanna. 

Þegar Landsmóti lauk blöstu við smá tímamót en Sigvaldi sagði skilið við Staðarhús þar sem hann hefur unnið allan síðastliðinn vetur. Ástæðan er sú að hann hefur ásamt fjölskyldu sinni flutt sig enn og aftur um set allaleið norður í Skagafjörð. Þar er Sigvaldi farinn að starfa við Háskólann á Hólum sem reiðkennari.  En þá má þó segja að söknuður verði í Borgarfjörðinn.

En sumarið hefur verið sérlega gott, blandað vinnu, fríi og flutningum. Fjölskyldan eyddi miklum tíma á Hamraendum sem er sumardvalastaður fjölskyldunar jafnt sem ferfætlingana sem þeim fylgja. Hér á Hólum er farið hausta verulega, frostnætur og snjór í fjöllum. Alvaran tekin við, nemendur mættir á svæðið og skólinn byrjaður.

Það hefur ansi mikið drifið á dagana frá síðustu fréttum. Sumarið er óneitanlega mætt, 17. júní kominn og farinn, landsmótið byrjar með fullum krafti í næstu viku og styttist óðum í verslunarmannahelgina..... kannski ekki alveg en sumarið er yfirleitt fljótara að fara en að koma og gott að vera á verði um að það fari ekki á undan manni inn í veturinn.

Á Staðarhúsum hefur verið í nógu að snúast, hrossin loks komin á grænt og önnur farin í frí, eitthvað hefur farið í keppni og annað í kynbótadóm. Á þessum annartíma mætti alveg fá auka stundir í sólarhringinn en þessar 24 sem fyrir eru verða bara að duga.

Um helgina fór Sigvaldi með hann Leiftur frá Búðardal vestur í Búðardal á Hestaþing Glaðs. Þar var skemmtilegt stemning og flottir hestar sem mættu til leiks. Eftir forkeppni í A-flokk stóð Leiftur efstur en tóku þeir félagar upp á því að skeiða ekki í úrslitunum og hröpuðu þar af leiðandi niður og ráku lestina í þetta skiptið. Leiftur er reyndur á keppnisbrautinni. Hann hefur m.a. verið Íslandsmeistari ungmenna með Ólafi Andra og att kappi í úrslitum á öðrum  stórmótum. Hann er einnig "útskrifaður" Hólahestur en Ólafur Andri notaði hann í námi sínu á Hólum

Sigvaldi fór með Leiftur í úrtöku fyrir Landsmót nú á dögunum fyrir hestamannafélagið Glað. Það voru fimm hestamannafélög á Vesturlandi sem héldu sameiginlega úrtöku á vellinum í Borgarnesi, rúmlega 80 skráningar og mikið af glæsilegum hestum sem mættu til leiks. Leiðinlegt þótti þó að einungis voru þrír dómarar sem dæmdu mótið. Það má lengi deila um hvort það sé ásættanlegt fyrir knapa að fá ekki að njóta vafans með einkunnagjöf og þá sérstaklega þá sem lenda í miklu ósamræmi hjá dómurum. Á svona mótum er oft mikið í húfi og geta smáatriðin skipt sköpum. Leiftur og Sigvaldi áttu fína sýningu en mikið ósamræmi dómara varð til þess að þeir sitja heima þetta landsmótið, eða hvað? Það hefði verið gaman að fá útlistun fjórða og fimmta dómara til að sjá hvar þetta hefði legið. Vonandi voru það samt bestu hestarnir sem fengu farmiða á landsmót í öllum félögum því það er jú það sem allir vilja, fá að sjá bestu hestana!

Þó að Sigvaldi verði ekki með hest í keppnisbrautinni þetta Landsmótið mun hann eiga fjöldann allan af börnum, unglingum og ungmennum í braut. Hann mun leiðbeina krökkum úr þremur hestamannafélögum hér á Vesturlandi fyrir og á móti. Þetta eru krakkarnir úr Faxa, Skugga og Glað. Þarna er hópur af flottum krökkum sem eiga án efa eftir að gera góða hluti á mótinu.

Sjáumst á Landsmótinu!